Keda sin bai vota òf vota pa opshon Si dia 17 Desèmber 2010, ta nifiká ku bo ta di akuerdo ku e siguiente puntonan: 1. Nos a bira siudadano Hulandes di 3 òf 4 rango; 2. Ta permití atrako riba penshun di behes di mas ku 50 mil florin di kada siudadano ku mester warda te 65 aña pa kobra muchu ménos penshun di behes ku Hulanda ta paga nan penshonadonan na Hulanda; 3. Tur empleado ku ta kobra riba 1500 florin pa luna mester paga 30.4% di nan salario na impuesto ku lo nifiká un sla pa tur pòtmòni; 4. A kita winstbelasting pa kompanianan grandi por gosa miéntras ta oumentá 5% OB pa 8% ABB ku tur siudadano mester biba kuné komo un karga adishonal; Oumento bárbaro di Erfpacht i introdukshon di Vastgoedbelasting riba propiedat ku lo kaba di masakrá e pueblo; 6. Legalisashon pa e.o. Kasamentu di Homoseksualnan, Eutanasia, Aborto etc;
Votando NO den e referèndem dia 17 di Desèmber próksimo lo bo vota pa dentro di 6 luna Gobièrnu organisá un referèndem kompletamente nobo ku e opshonnan ku ta rekonosé pa Nashonnan Uni kualnan ta 1. Asosashon Liber; 2. Integrashon; 3. Independensia.

Votando NO bo ta votando pa bo mes por skohe liber den e próksimo referèndem kon bo ta deseá pa Boneiru su futuro struktura estatal mester ta.
Kualkier Gobièrnu ku ta na mando bou di e sirkunstansianan aktual no por vota kontra e medidanan ku ta wòrdu tuma pa oumentá entrada di Gobièrnu pasobra esaki ta algun di e kondishonnan ku CFT a base di nan poder i instrukshon di Hulanda tin na nan disposishon pa pone preshon riba e pueblo di Boneiru. Hopi Hulandes Oropeo aki na Boneiru mes no ta di akuerdo kon e pueblo aki ta wòrdu trata i nan tambe a djòin e grupo di NO ku ta kresiendo rápidamente.

Pueblo a komprondé kiko ta sper’é i e medidanan ku a pasa kaba ta djis un ñapa di e medidanan kontra di e pueblo. Ta asina Hulanda ta yuda e pueblo? Awor T’e Ora ta rekordá un i tur ku Boneiru ni Sint Eustatius NO a vota pa a wòrdu integrá den Hulanda. Integrashon no ta tabata deseo di pueblo na 2004. Pueblo ta bai papia sin distinshon di kolo polítiko òf partido polítiko.

Bai vota NO!

 Movementu ‘Awor T’e Ora’,

 ing. Johan (Jopey) Giskus
Kordinadó

Awor T’e Ora a tuma nota ku e boletin informativo No. 1 produsí pa e komishon di referèndem 2010 ta karesé di informashon. Lei di referèndem ta deskribí bon kla ku si e pueblo skohe pa e opshon NO, ku gobièrnu tin den su man pa organisá e próksimo referèndem denter di 6 luna konforme resolushon 1541 di Nashonnan Uni kual ta enserá e opshonnan di Integrashon, Asosashon liber i Independensia. Ora ku pueblo kaba di skohe pa e opshon NO, nos Konseho Insular i mandatarionan mester asumí nan responsabilidat i organisá un referèndem nobo pa e pueblo di Boneiru! Hulanda, meskos ku e gobièrnunan ku tabata sinta tantu riba nivel insular komo riba nivel sentral, ta kulpabel di no a duna e pueblo oportunidat den un referèndem liber pa puntra pueblo si e pueblo ta di akuerdo òf no pa a wòrdu integrá mitar mitar den Hulanda den un entidat públiko (Openbare Lichaam) konforme artíkulo 134 di e Konstitushon (Grondwet) Hulandes ku sigur no tabata konosí den forma kla pa e pueblo di Boneiru den e referèndem na 2004.

E esküs ku si a tene referèndem promé ku 10-10-10 ku e desishon di e pueblo di Boneiru lo por a stroba e otro islanan di logra nan status nobo, ya no ta konta mas. Pueblo di Boneiru ta bai papia awor! Ta pueblo tin último palabra den su man. Partido di Santana ku Bijkerk no ta di akuerdo ku integrashon mitar mitar pero nan no kier pueblo bai vota tampoko! Esakinan ta polítikonan sin wesu di lomba ku no kier ta karni ni piska! Basta ku hipokresia!

Nos polítikonan a faya ratifikando “slotverklaring” i despues “overgangsakkoord” debilitando nan mes posishon di por a negoshá den forma digno pa e pueblo di Boneiru.

E mesun polítikonan awor tin e obligashon moral di por lo ménos konsehá nan votadornan pa vota NO di moda ku nan por haña un tiki mas espasio pa denter di 6 luna den e próksimo referèndem pueblo skohe konsientemente i den libertat nan futuro struktura estatal. Hulanda mester komprondé i akseptá e realidat aki! Si no ta asina anto lo ta opvio ku e Gobièrnu Hulandes su plannan ta pa guli nos den nan sistema.

Ni Boneiru ni Sint Eustatius NO a vota pa wòrdu integrá den Hulanda! Awor e pueblo di Boneiru tin e oportunidat di ekspresá su mes sin wak kolo òf partido polítiko.

Skohe pa bo mes! Vota NO.

Movementu ‘Awor T’e Ora’,

ing. Johan (Jopey) Giskus
Kordinadó

Dia 17 di Desèmber 2010 ora pueblo haña oportunidat di vota den referèndem e lo demostrá su malkontentu  ku polítikonan a mara nan na man ku pia dor di aseptá y ratifiká ‘Slotverklaring’ di òktober 2006.Ta den e Slotverklaring aki e venenu ku a duna pueblo di Boneiru tabata sinta, pasobra ta para klaramente den dje ku Boneiru lo a bira un entidat públiko (‘openbaar lichaam’) a base di artíkulo 134 di Konstitushon Hulandes.Tur polítiko mester a realisá na e momento ei ku nan ta permitiendo pa Hulanda aneksá Boneiru.En bes di laso direkto KU Hulanda nos a haña awor Laso Direkto DEN Hulanda. Nos tur ta mirando awor e resultadonan di esaki: gobièrnu di Boneiru ta efektivamente bou di kuratela y no tin mag di tuma ningun desishon di importansia. Resientemente un diputado a bisa ku no tin plaka pa drecha e kaminda malunan na Boneiru. Na Hulanda si estado hulandes (‘Rijk’) ta hinka miónes den ‘snelwegen’ rònt Hulanda. Nos aparentemente ta suidadanonan di segundo rango i tin mag di kore riba kamindanan yen di krater.

Ta opvio ku gobièrnu di Boneiru no ta haña chèns pa hasi masha kos pa pueblo.Ta Rijksdienst Caribisch Nederland (RCN) ta manda na Boneiru awor i CFT tin e kontròl finansiero total. Esun ku no kier mira esei nos ta konsehá di bai dòkter di wowo lihé.Tur sèn ku gobièrnu di Boneiru ta produsí ta bai Hulanda i gobièrnu di Boneiru tin ku bai na rudia pidi Hulanda pa por fabor manda un tiki di nan mes plaka bek Boneiru den forma di  e asina yama ‘vrije uitkering’. Na kasi tur departamento di Boneiru ta Hulandesnan Europeo ta tuma e desishonnan prinsipal. Pueblo dia di referèndem bo tin oportunidat pa duna nos mes polítikonan un tiki di nan dignidat bek dor di vota NO kontra di integrashon mitar mitar den Hulanda. Nos ta hendenan kulto ku no por permití ku na aña 2010 nos ta wòrdu rekolonisa pa Hulanda.Awor T’e Ora ta hasi un apelashon serio riba esnan ku mester sa mihó pa por fabor stòp di indoktriná nos hendenan i bisanan ku nos mes no por. Semper nos mes a rigi nos destino i no tin ningun motibu pa nos permití siguiente generashonnan di Boneriano bira mucha manda di Hulanda.

 Vota NO den referèndem.

 AWOR T’E ORA
ing.Jopie ‘Jopey’ Giskus
kordinadó

Dia 17 di Desember 2010 despues di hopi insistensia di parti di miembro di konseho insular mr. Anthony Nicolaas pueblo lo por hasi uso di su derecho eksklusivo di voto den referendem. E opshonnan di voto (SI of NO) ta simpel, pero a la bes ku konsekuensianan serio pa e pueblo di Boneiru. Si pueblo skohe pa SI ta nifika ku pueblo ta bai di akuerdo ku e manera ku Boneiru a wordu aneksa dor di Hulanda i ku Boneiru lo keda integra mitar mitar den Hulanda. Pueblo di Boneiru e ora ei lo keda tambe suidadano di segundo i terser rango den reino hulandes.

Si pueblo di Boneiru vota NO den referendum pueblo lo hanja dentro di 6 luna segun e lei di referendum e oportunidad pa skohe den un referendem nobo entre e opshonnan internashonalmente rekonose: Asosashon Liber, Integrashon (na un manera drechi) of Independensia. Awor T’e Ora a skucha un partido politiko konseha pueblo pa no bai vota den referendem.Esaki ta un atentado kontra di libertad di ekspreshon di e pueblo Boneriano. E mesun partido aki na mart proksimo si lo pidibo pa bai vota den elekshon.Esaki ta hipokresia!

Awor ku e ola di NO ta birando mas i mas fuerte diripiente senjor Jonchi Dortalina ta sali buska  apoyo di partido Demokrat pa para e referendem di 17 di desember 2010. Awor Te Ora  ta manda un mensahe kla i raspa pa tur politiko: HANDS OFF! Keda leu for di e referendem di pueblo. E referendem aki mester a bin masha dia kaba.

Ni Boneiru ni St.Eustatius a vota pa bira parti di Hulanda. Pues awor ku pueblo porfin a hanja e oportunidat di ekspresa su mes di un manera liber, KEDA LEU. No permiti ningun hende bin manda riba nos i bin forsa leinan immoral riba nos manera nan a hasi kaba.

Vota NO den referendem.

AWOR T’E ORA
ing.Jopie ‘Jopey’ Giskus
koordinador